ROXAS CITY – Ginapreparahan na karon sang lokal nga gobyerno sang Capiz ang pagpauli sang halos 200 seafarers sa probinsiya nga na-stranded sa Cebu kag Metro Manila bangud sa ginpatuman nga lockdown tuga sang coronavirus disease (COVID-19) pandemic.
Ini ang ginpahayag mismo sang tagpamaba sang provincial government nga si Atty. Atlas Catalan sang mainterview sang Bombo Radyo Roxas.
Suno diri nga sa 200 seafarers, gikan sa Cebu City ang 50 sa mga ini samtang mahalin naman sa Metro Manila ang halos 150 sa mga ini nga lunsay residente sang probinsiya sang Capiz.
Gin-athag man ni Catalan nga antes makapauli sa ila tagsa ka pamilya, magapaidalom sa strict mandatory protocols ang nasambit nga mga seafarers.
Magaagi ang mga ini sa Iloilo para sa swab testing kag magapaidalom sa 14 day mandatory quarantine sa pila ka eskwelahan nga ipahamtang bilang quarantine area sa Capiz.
Suno sa kay Catalan nga ang Capiz National High School kag Capiz State University-Dumarao Campus ang ginapilian nga quarantine area apang mas paborable diri ang Capiz National High School.
Gindugang pa sini nga mas malapit ang Capiz National High School sa Roxas Memorial Provincial Hospital pananglitan nga maglain ang pamatyag sang mga ini.
Sa karun ginproseso na sang provincial government ang mga rekisitos sa Department of Education Capiz Schools Division para sa pag-usar sang nasambit nga buluthuan.
