ROXAS CITY – Magapadala sang iya nga personal letter request si Capiz Governor Esteban Evan ‘Nonoy’ Contreras sa Regional Inter-Agency Task Force on COVID-19 natuhoy sa apelar sang Capiz Medical Society nga 14-day moratorium ukon temporaryo nga pagpaiway sa pagpauli sang mga Returning Overseas Filipinos (ROF’s).
Ini matapos nga nagpakighinala ang gobernador sa tanan nga miyembro sang Provincial IATF.
Magluwas ini suno sa gobernador sa igadihon nga resolusyon sang League of the Municipalities in the Philippines (LMP) Capiz Chapter nga nagasuporta sa ginahinyo nga moratorium.
Ginpahayag pa sang gobernador nga igasaad man sini sa iya ipadala nga sulat ang hinyo nga dugang nga augmentation sang mga medical frontliners sa probinsiya.
Nangin ‘unanimous’ man suno diri ang desisyon sang mga miyembro sang provincial IATF nga magpadala sang resolusyon sa regional IATF agud ma-reconsider ang probinsiya sa ginpaguwa nga operational guidelines sang national IATF natuhoy sa pagbaton sang mga magapauli nga mga ROF’s.
Mahibaluan nga nasaad sa operational guidelines nga ang tanan nga ROF’s nga maga-negatibo sa real-time polymerase chain reaction (RT-PCR) test sa Manila ang indi na dapat pag-ipaidalom sa swab test kag facility quarantine sa ila pagpauli sa probinsiya.
Apang dako ini nga risgo suno sa gobernador bangud may mga ROF’s nga bisan una na nag-negatibo sa swab test sa Manila, nagapositibo pa sila sa ila nga pagpauli.
Mahibaluan nga sa karon, naka-isolate ang gobernador matapos nga ini ang nagpositibo sa COVID-19.
Ginpahayag sini nga nagapabilin siya nga asymptomatic ukon wala sang sintomas apang padayon nga ginapabakod ang iya ikaayong-lawas pinaagi sa pag-ehersisyo, pagkaon sang masustansiya nga pagkaon kag pag-inom sang bitamina.
Sa pihak sini suno kay Contreras, nagapadayon siya sa iya nga trabaho kag pagpakighinala sa mga natungdan para sa kampanya kontra COVID-19 pinaagi sa online conferences.
