ROXAS CITY – May mga amendments ukon pagbag-o nga pagahimuon sa ginapatuman sa karon nga border restrictions sa mga tawo nga magahalin sa Iloilo kag magasulod sa siyudad sang Roxas kag probinsiya sang Capiz.
Ini ang ginpahayag ni Capiz Governor Esteban Evan ‘Nonoy’ Contreras sang mainterview sang Bombo Radyo.
Kasunod ini sang pagpakigsapol sang gobernador sa Inter-Agency Task Force (IATF) natuhoy sa nasambit nga pagsulundan.
Ginpahayag man sang gobernador nga nag-apelar naman si Iloilo City Mayor Jerry Treñas sa regional IATF rason nga bukas man ini sa posibilidad sang pag-‘tonedown’ ukon magagmay nga pagpahalog sa ginapatuman nga restrictions sa mga magasulod sa Capiz.
Posible anuman nga oras subong nga adlaw sang Lunes, Agosto 17, ukon buwas sang aga, Agosto 18, iga-anunsiyo sini ang pila ka mga pagbag-o sa nasambit nga mga pagsulundan.
Posible man nga i-lift ukon dulaon ang pag-tsekyar sang medical certificate para sa mga maga-agi sa border nga may mga cargo.
Ginpanindugan naman sang gobernador nga ang ini nga lihok ang kasunod sang padayon nga pagsaka sang kaso sang coronavirus disease (COVID-19) sa Iloilo bangud sang local transmission.
Kinahanglan suno diri nga amligan ang ikaayong-lawas sang mga pumuluyo sa Capiz bangud may yara naman diri sang local transmission.
Mahibaluan nga sa karon nga pagsulundan, kalakip sa mga rekisitos nga kinahanglanon amo ang Valid ID, Thermal Scanning ukon pag-tsekyar sang temperatura pinaagi sa thermal scanner, Medical Clearance/Certificate para sa mga Authorized Persons Outside Residence kag indibidwal nga (Valid for 72 hours); Letter of Acceptance (LOA) para sa mga LSI’s kag Travel Authority naman para sa mga Authorized Persons Outside Residence (APOR).
Pag-abot naman sa mga public transport vehicles nga magasulod sa probinsya, kinahanglan nila magsumiter sang ‘passenger manifest’ sa border checkpoints, Vehicle Identification, lugar kun sa diin ini naghalin nga destinasyon, Date and time of departure from origin kag pila ka mga nagakaigo nga impormasyon.
