ROXAS CITY-Nagapati si Capiz Governor Esteban Evan Nonoy Contreras nga batunon sang mga alkalde ang ginpahamtang nga isolation facility para sa mga asymptomatic patients nga nagpositibo sa Coronavirus Disease ukon COVID-19 sa Capiz Gymnasium, Villareal Stadium.
Sa interview sang Bombo Radyo kay Contreras ginpahayag sini nga kalabanan sa mga alkalde sa probinsiya ang nagapabor sa nasambit nga quarantine facility.
Apang, aminado ang gobernador nga kinahanglan pa i-konsulta kay Roxas City Mayor Ronnie Dadivas ang nasambit nga plano bangud sakup ini sang siyudad.
Suno kay Contreras nga wala na sang rason pa nga magpamalibad ang mga alkalde bangud ang probinsiya na ang magastos para sa nasambit nga isolation facility.
Apang gin-athag sang gobernador nga bukas sa gihapon ini sa mga suhestyon sang iban nga mga alkalde nga indi kumbinsido sa isolation facility sa Capiz Gymnasium sa Villareal Stadium.
Samtang, nagapanawagan naman si Contreras nga kun mahimo ipaiway anay ang pamulitika subong nga nagapangatubang ang pungsod sa pandemiya agud madali nga masolbar ang mga problema partikular na diri sa probinsiya.
