BOMBO ROXAS – Nagpasalig si Capiz Governor Esteban Evan Nonoy Contreras nga buligan sini ang mga pumuluyo nga nag evacuate sa ila mga puloy-an bangud sa kahadlok sang mga pulis kag militar sa banwa sang Tapaz, Capiz.
Ini ang ginpahayag ni Contreras sang mainterview sang Bombo Radyo.
Suno kay Contreras nga nagpadulong ini sa evacuation center agud bisitahan ang mga evacuees kag nabilin nga pamilya sang mga napatay sa ginpatigayon nga Simultaneous Serving Search Warrant sang mga otoridad sadtong Disyembre 30, 2020.
Ginpahayag sini nga nabatyagan niya ang kalain sang buot kag pagpangasubo sang mga pumuluyo ilabi na sa mga himata sang nagtaliwan sa amo nga operasyon.
Nagpabutyag man ang mga evacuees sa gobernador sa ila kaakig kag kahadlok nga nabatyagan sa mga militar kag pulis. Nagapakig-unong naman ang gobernador sa pamilya sang mga nagtaliwan.
Bangud diri, nagpasalig si Contreras nga magabulig ini sa mga evacuees pinaagi sa paghatag sang mga food packs, livelihood kag financial assistance.
Magluwas diri, magahatag man ini sang ayuda sa nabilin nga mga himata sang siyam ka mga indibidwal nga ginbawian sang kabuhi kasunod sang nasambit nga operasyon.
Ginatugyan naman sang gobernador ang imbestigasyon sa nagakaigo nga mga ahensya kalakip na ang Commission on Human Rights sa natabo nga operasyon.
Samtang, natalana naman nga magpatigayon sang paghinun-anon si Contreras sa katapo sang Armed Forces of the Philippines kag Philippine National Police
Matandaan nga una na nakapadulong ang gobernador sadtong Enero 2 kun sa diin nagpanagtag na ini sang bulig sa mga evacuees.
