ROXAS CITY -Ginkompirmar ni Capiz Governor Esteban Evan “Nonoy” Contreras nga may yara sang tatlo ka mga panibag-o nga kaso sang COVID-19 nga napagkit sa probinsiya.
Sa interview sang Bombo Radyo kay Contreras ginpahayag sini nga isa ka 22-anyos nga lalaki kag Locally Stranded Individual nga may yara sang travel history sa Muntinlupa City kag Metro Manila kag residente sang banwa sang Panay ang nagpositibo sa COVID-19.
Samtang, ang ikaduha naman amo ang 31-anyos nga lalaki nga may yara sang travel history sa Japan kag Metro Manila nga residente sang siyudad sang Roxas.
Ikatatlo naman amo ang 35-anyos nga lalaki nga may yara sang travel history sa Norway kag Metro Manila nga residente sang banwa sang Pontevedra.
Sa tatlo ka mga nagpositibo duha diri ang Returning Overseas Filipinos ukon ROF’s.
Suno kay Contreras nga nagapadayon ang contact tracing sa mga indibidwal nga naka-close contact sang mga nagpositibo.
Gin-athag man ni Contreras nga sumugod subong wala na nagabaton sang asymptomatic patients ang Roxas Memorial Provincial Hospital ukon RMPH.
Ginpahayag ni Contreras nga ginkasugtan sang Provincial Inter Agency Task Force nga symptomatic covid patients gid lamang ang batunon sang nasambit nga ospital agud malikawan ang pagginutuk sa ospital.
Samtang, wala pa sang plano si Contreras nga ipaidalum sa RT-PCR test ang mga locally stranded individuals sa Metro Manila antes magpauli sa probinsiya bangud indi pa masarangan sang lokal nga gobyerno nga abagahon ang pagpatigayon sang swab test sa ila.
