CAPIZ -Tatlo ka mga awards ang nakuha sang probinsya sang Capiz kadungan sang Association of Tourism Officers of the Philippines (ATOP) Pearl Awards nga ginhiwat sa Baguio City.
Ini ang ginalakipan sang Best Tourism-Oriented Local Government Unit (Provincial Category), Best Cultural Festival para sa Capiztahan kag Best Institutionalized Program For Culture and the Arts para sa Lutong Capisnon.
Sa interview sang Bombo Radyo kay Alfonsus Tesoro, head sang Capiz Provincial Tourism and Cultural Affairs Office, iya ginpahayag nga ang mabaskog nga suporta sang mga tawo sa Capiz kag partner groups ang nakahatag gid sang dako nga kontribusyon sa kadalag-an sang probinsya.
Sa Best Tourism-Oriented Local Government Unit , diri makit-an ang maathag nga tourism plan nga ginhimo sang provincial government sa idalom sang liderato ni Governor Fredenil Castro nga ginatawag “Turismo sang Maragtas: The Capiz Tourism Development Plan (2024-2028).”
Ang Capiztahan ang isa naman ka province-wide festival sa probinsya nga ginaselebrar kada bulan sang Abril sa pag-komemorar sang 125th founding anniversary sang civil government sang Capiz. Diri makit-an ang street dancing, madinuagon nga floats, kag nagatanyag sang “unlimited” seafood.
Samtang , ang Lutong Capisnon ang masami nga ginakalangkagan nga aktibidad sa tion sang Capiztahan nga isa ka cultural program sa diin sentro ang mga traditional nga pagkaon sang Capisnon, mga lokal nga panakot, kag ang proseso sa pagpreparar sini.
