ROXAS CITY- Ginpakigbahin sang tagpamaba sang Capiz Provincial Health Office ang dapat nga himuon subong nga padayon nga nagasaka ang numero sang kaso sang Coronavirus Disease ukon COVID-19 sa probinsya.
Sa interview sang Bombo Radyo kay Mr. Ayr Altavas ginpahayag sini nga dapat amligan ang ikaayong lawas pinaagi sa pagsunod sang mga minimum health protocols pinaagi sa pagsuksok sang facemask, faceshield, paggamit sang alcohol kag disinfectant agud malikawan ang nasambit nga balatian.
Suno kay Altavas nga wala sang may ginapili ang virus apang wala sang problema kun magahalong lamang ang mga pumuluyo.
Dugang pa sini nga may yara man sang pila ka mga medical workers ang nalatnan sang virus kun sa diin kadam-an sa ila ang naka-close contact sa mga nauna nga nagpositibo kag nagatatap sa mga COVID-19 patients.
Gani, bisan ang mga ospital sa probisnya ang apektado naman sa ila nga operasyon bangud sa mga medical workers nga nagpositibo kag nagapaidalom subong sa quarantine period.
Apang, sa oras nga matapos ang ila quarantine period nagabalik man sila sa ila trabaho kag ginahatagan man sang mga nagakaigo nga protective equipments kapareho sang PPE’s.
Ginpahayag man sini nga wala man nagapabaya ang PHO sa ila nga responsibilidad sa pag-impormar sa mga pumuluyo.
Sa bahin naman sa pagpalubong sa mga napatay bangud sa COVID-19, kinahanglan suno kay Altavas nga dapat magsunod gid sa mga nagakaigo nga minimum health standard sa paglubong.
Kinahanglan nga nalubong sang maayo ang COVID-19 casualty sa sulod sang 12 oras ukon 6 feet below the ground kag dapat nga selyuhan ang nitso ukon pantyon sang napatay.
Samtang, sa kabug-ang nga datos sang mga kaso sa probinsya naglab-ot na sa 311 ang COVID-19 cases sa Capiz.
Ini ang ginalakipan sang Cuartero, Ivisan kag Pres. Roxas nga may (7), Dao nga may (5), Dumalag kag Maayon nga may (6), Dumarao nga may (8), Jamindan nga may (22), Mambusao nga may (14), Panay nga may (10), Panitan nga may (8), Pilar nga may (16), Pontevedra nga may (19), Roxas City nga may (154), Sapian nga may (1), Sigma nga may (4) kag Tapaz nga may (17).
Nag-apelar naman ang PHO sa mga pumuluyo nga mag kooperar agud nga malikawan ang pagdamo sang kaso sang amo nga balatian.
