ROXAS CITY – Preparado na ang mga katapo sang mga kapulisan sang Capiz Police Provincial Office ukon Capiz-PPO para sa nagahilapit nga tigkalalag 2020 kadungan sang COVID-19 Pandemic.
Ini ang ginpahayag ni CPPO Provincial Director Police Colonel Julio Gustillo Jr., sang mainterview sang Bombo Radyo.
Suno kay Gustilo nga nakadeploy na ini sang mga police personnel sa tanan nga mga pribado kag pampubliko nga mga patyo sa probinsya.
Ginpahayag sini nga duha ka mga police personnel ang igapahamtang sa kada patyo sumugod sa Oktubre 29 tubtob Nobyembre 4.
Magluwas sa mga police personnel, may yara man sang mga medical responders, traffic enforcers kag force multipliers nga nahamtang sa tagsa ka mga patyo sa tion nga may yara sang magkahinabo nga mga insidente.
Nagpahanumdom man si Gustillo sa publiko nga kun mahimo likawan ang pagdala sang mga matalom nga hinganiban kag magsunod gid sa mga nagakaigo nga mga minimum health standards kapareho sang pagsuksok sang facemask kag faceshield sa oras nga mahimo na makakadto ang mga pumuluyo sa mga patyo.
Samtang nagpasalig naman ini sa publiko nga makita gid ang presensya sang mga kapulisan sa tagsa ka mga patyo agud masiguro ang kalinong kag katawhay sa probinsya sa adlaw sang pista minatay.
