ROXAS CITY — Wala nagkulang ang 1st Maneuver Platoon sang Capiz Provincial Public Safety Company sa pagtinguha nga mapunggan ang pagluntad sang mas seryoso nga kinagamo sa tunga sang mga mangunguma kag sang kampo ni Punong Barangay Ferdinand Bacanto sa Barangay Culilang, President Roxas, Capiz.
Apang wala nila mapunggan ang nagluntad nga pagpangluthang sa mga mangunguma nga nagresulta sa kamatayon sang isa ka persona kag pagkasamad sang apat ka iban pa.
Suno kay PSUPT. Giovanni Musico, deputy provincial director sang Capiz Police Provincial Office kag company commander sang CPPSC, gintinguhaan man nila nga makadayalogo ang kampo sang mga mangunguma kag ni Bacanto kaupod sa Department of Agrarian Reform agud indi na maglala pa ang ila away sa duta sa lugar.
Apang limitado lamang suno sa iya ang mahimo sang kapulisan agud makapatunga sa konflikto bangud isa ka sibil nga kaso ang nagapatunga sa magtimbang nga bahin.
Suno sa iya nga sarang lamang sila makapatunga sa magkaaway nga kampo kun may yara na sang magluntad nga mga kinagamo.
Ginpanindugan man ni Musico nga ginhimo sang mga kapulisan ang ila masarangan nga mahimo sang nagluntad ang pagpangluthang, apang suno sa iya nga malayo ang distansiya sang mga ini sang magluntad ang insidente rasun nga wala nila matumod ang mga suspetsado nga nagpangluthang kag wala nila sila malagas.
Kinahanglan man suno sa iya sang mga kapulisan nga madepensahan ang ila mga kaugalingon nga indi masalabat sang natabo ang pagnilukpanay rasun nga nagpanago man sila agud indi sila maigo.
Apang mahibaluan nga base sa panaysayon sang mga mangunguma nga nakasaksi sang insidente, kapin sa 15 metros lamang ang nahamtangan sang mga pulis sa nagaluntad nga gumuntang, apang wala sila sang may ginhimo agud mapunggan ini.
