Nagpaandam ang Capiz Provincial Health Office sa epekto sang leptospirosis kasunod sang lapnagon nga baha sa probinsya.
Sa interview sang Bombo Radyo kay Dr. Ramon Alex Nolasco, Head sang Provincial Healh Office, iya ginpahayag nga personal ini nga naglibot sa syudad sang Roxas kag pila ka mga kabanwahanan sa Capiz agud magtsekyar sang mga nagkalapilasan kag maghatag sang mga hygiene kits kag bulong batuk sa leptospirosis kaangay sang doxycycline sa mga pumuluyo nga yara sa evacuation center.
Suno kay Dr. Nolasco, may yara pa sang available nga 60,000 capsules sang doxycycline ang mga healthcare facilities samtang 35,000 indibidwal na ang nakainom sang nasambit nga bulong ukon 132,000 ka capsules sa idalum sang guidance sang mga healthcare professionals.
Gin-athag man ni Dr. Nolasco nga libre ang bulong batuk sa leptospirosis kag kinahanglan lamang nga magpadulong sa mga healthcare centers.
Pahayag pa niya, kun makabatyag sang mga sintomas sang leptospirosis kasubong sang panalakit kag pagpangluya ang lawas, ginahilanat kag pagsakit sang ulo, gilayon na nga magpadulong sa ospital agud matagaan sang pagtamod kag indi na maglala pa ang balatian nga mahimo man tunaan sang kamatayon.
Magluwas sa leptospirosis, ginabantayan man sang Provincial Health Office ang iban pa nga mga balatian kasubong sang influenza-like diseases kag water-borne diseases kasubong sang dengue.
Dugang pa sang natungdan, bangud gindeklara na ang state of calamity sa probinsya sang Capiz, lauman nga padayon ang serbisyo medikal para sa mga nagakinahanglan.
Interviewed by: Bombo Lynd-C Bade via Bombohanay Bigtime
