ROXAS CITY-Ginkompirmar sang chairman sang Committee on Finance and Appropriations sang Sangguniang Panlalawigan nga wala gin-aprubahan ang kapin P28.2 milyones nga supplemental budget nga ginrequest ni Capiz Governor Esteban Evan Contreras para sa pagmentinar sang mga provincial road sa probinsiya.
Ini ang ginkompirmar ni Board Member Jonathan Sonny Besa sang mainterview sang Bombo Radyo.
Ginpahayag ni Besa nga wala gin-aprubahan sang konseho ang ginrequest sang gobernador nga supplemental budget para sa pagmentinar sang mga karsadahon sa probinsiya bangud nagalapas ini sa probisyon sang appropriation ordinance nga gindihon sang konseho.
Suno kay Besa nga indi mahimo nga gamiton sang probinsiya ang nakapa-in na nga pondo para sa personal services apisar nga bakante sa gihapon ini.
Apang gin-athag ni Besa nga mahimo nga kuhaon ang pondo sini gikan sa unappropriated surplus kag savings nga wala magamit sang probinsiya.
Gindugang pa ni Besa nga wala ini malakip sa ginpondohan nga Annual Investment Plan subong nga tuig bangud posible nga gindugang ini nga mga road rehabilitations subong nga tuig nga ginpalab-ot sa gobernador.
