BOMBO ROXAS – Nangin matawhay ang dalagan sang sitwasyon sa sulod sang Capiz Rehabilitation Center (CRC) matapos ginsaylo sa Provincial General Services Office (PGSO) sanday anay Provincial Warden Arjuna Yngcong kag Administrative Officer Andreo Llaver.
Ini ang ginkumpirmar ni PGSO Chief kag Officer-in-Charge (OIC) Provincial Warden Mr. Eduardo “Boy” Apaap sang mainterview sang Bombo Radyo Roxas.
Suno kay Apaap nga matapos ang nagluntad nga noise barrage sang mga inmates sa CRC, gilayon ini nga nagpatigayon sang sinapol sa tanan nga mga nagabantay sa nasambit nga talatapan kag nagpahibalo nga ini ang temporaryo nga magatal-us kay Yngcong.
Ginpahayag sini nga bilang kabahin sang iya pagpungko nga Provincial Warden may pila ini ka mga ginpangkay-o sa nasambit nga pasilidad.
Kalakip sa mga ginpakay-o ang parte sang kusina, ang pa-ilis sang mga guba nga bombilya sang suga kag iban pa.
Ginpasiguro man ni Apaap nga mabatian sang mga opisyal sang gobyerno ang mangin panawagan sang tagsa ka mga inmates.
