ROXAS CITY – Dismayado ang Capizeña OFW matapos natukiban sini sa Roxas City Airport nga ginbukad ang iya maleta kag nadula ang iya mga kagamitan.
Sa interview sang Bombo Radyo kay Jonavie Vigo sang Barangay Milan, Jamindan nagpauli ini sa probinsiya kahapon nga adlaw, sa diin kadungan sa iya pag-abot ang iya bagahe apang late na nakuha sa pahugpaan.
Suno kay Vigo, wala sini ginsapak ang nabilin nga maleta sa luggage area bangud nakaputos ini sa wrapping plastic kag indi kaangay sang iya maleta.
Apang, gin-insister sang empleyado sang amu nga airline company nga iya ang amo nga maleta bangud nakapangalan ini sa iya.
Amo na lamang ang kakibot sang tagreklamo sa iya nga pagbukas sang maleta kaupod ang presensya sang airport police kag empleyado sang airlines nga gisi na ang iya nga bag sa diin kasubong nga pwersa ini nga ginbuksan agud makuha ang mga items sa sulod.
Kalakip sa mga nadula sa bagahe ni Vigo ang mga tsokolate kag alahas nga pasalubong kuntani sa mga himata sini sa probinsya.
Ginkatingala pa ni Vigo nga sa pihak sang pagkadula sang iban nga mga kagamitan, wala sang pagbag-o sa kabug-aton sang iya bagahe.
Dugang pa sini, madugay na siya nga OFW kag masami nagasakay sa amu nga airlines apang ini ang una nga kahigayunan nga nadulaan siya sang pagkabutang.
Nagapati man ini, nga posible sa Manila natabo ang insidente kag diri lang sa Roxas City natukiban.
