ROXAS CITY – Ginpasidunggan bilang isa sa mga Top Engineers sa United Arab Emirates (UAE), sa ginhiwat nga Top Filipino Engineers and Architects Summit Awards, sang The Filipino Times, si Engineer Leonester Diestro, nga tumandok sang Ivisan, Capiz.
Sa interview sang Bombo Radyo kay Engr. Diestro, kapin 19 na katuig nga nagatrabaho sa luwas sang pungsod, ginpahayag sini nga dako nga bagay ang makilala kag mapasidunggan bilang Pinoy nga enhinyero sa isa ka middle east country.
Nahibaluan nga nangin presidente man ini sang ila organisasyon sa amu nga pungsod, kag labing una nga ginpasidunggan bilang most outstanding award sa community project, nagikan sa Philippine Institute of Civil Engineers – National.
Wala man suno diri sang diskriminasyon sa ila nga mga babayi, nagikan sa iban nga mga lahi nga enhinyero.
Aminado man si Diestro nga sang paglupok sang pandemya, naapektuhan man ang iya pagtrabaho kag nag-abot sa punto nga nawad-an man suno ini, apang nagapati ini nga kun updan gid lamang sang pangamuyo ang pagtimakas, panigurado nga malampuwasan gid ang mga pagtilaw.
Mensahe sini sa mga bag-o pa lamang ukon luyag nga mangin enhinyero, nga hibaluon ang luyag nga matabo sa kabuhi, kinahanglan nga planuhan ini, kun indi man matabo ang una nga plano, dapat may yara sang madamo pa nga reserba, tubtob nga maabot ang handom, kag importante ang pagpangamuyo.
