ROXAS CITY – Tuman nga kalipay ang nabatyagan sang isa ka Capizeño Fireman matapos nga ginbuligan sini ang isa ka ginang paanak sa sulod sang isa ka salakyan sa Quezon City
Ini ang ginpabutyag ni Fire Office 1 James Michael Ezpeleta sang Barangay Lawaan, Roxas City sang mainterview sa Good Morning Philippines program.
Suno kay Ezpelata nga samtang yara ini sa ila opisina naga-duty may yara sang nagpalab-ot sa ila sang impormasyon nga may isa ka ginang nga manugbata sa isa ka salakyan matapos nga ginbalibaran sang isa ka ospital.
Bangud nga isa man ini ka registered nurse sang una wala ini nagpangduha-duha nga buligan ang ginang.
Ginpahayag sini nga pag-abot niya sa salakyan nagaguwa na ang ulo sang lapsag sa tagu-angkan sang ginang rason nga ginpakamaayo sini nga alalayan kag ginhimo ang kutob nga masarangan agud mapaguwa ang lapsag nga luwas.
Nakulbaan man ini sa umpisa apang wala na ini sang iban pa nga ginapanumdom kundi ang salbaron lamang ang kabuhi sang mag-iloy.
Dugang pa sini nga hinali na lamang nga nadula ang iya kahadlok ukon kakulba sang nakita na lamang kag nabatian sini ang paghibi sang lapsag.
Gintawag pa ni Ezpeleta ang amo nga lapsag nga “cute baby girl” kun sa diin indi masukat ang iya nga kalipay sang nakita sini nga luwas ang pagguwa sang lapsag.
Mahibaluan nga antes pa man nag-abot ang ambulansya sa lugar nakaguwa na ang lapsag sa taguangkan sang amo nga ginang.
Gilayon naman ini nga ginpasalamatan sang ginang kag bana man sini sa ginhimo nga pagkabaganihan ni Ezpeleta.
Magluwas diri, nagpasalamat man ini sa iya mga kasimanwa sa probinsya sang Capiz bangud man sa mga congratulatory message nga nabaton sini nagikan sa iya mga abyan, pamilya kag mga kakilala.
