ROXAS CITY — Ginsaysay sa Bombo Radyo sang Capizeño nga nagpositibo sa coronavirus disease 2019 (COVID-19) ang iya naagyan kag kahimtangan subong matapos nga nalatnan sang nasambitan nga balatian.
Suno kay Patient No. 13, residente sang Jamindan kag empleyado sang kapitolyo probinsiyal, Pebrero 25 sila nag-abot sa Metro Manila agud magtambong sa national convention sang Philippine Councilors League kaupod ang iban pa nga naggikan man sa probinsiya sang Capiz.
Aminado ini nga may mga kaso na sang COVID-19 sa Metro Manila apang manubo pa lamang ang numero rasun nga wala man siya nagkahangawa.
Pagkatapos sang convention, nakalagaw pa sila sa pila ka mga lugar sa Metro Manila antes nagpauli sa probinsiya sang Marso 2.
Nagsulod pa ini sa iya ginatrabahuan nga opisina sang isa ka board member sa kapitolyo sang Marso 4 kag 5.
Nakabatyag siya sang pagpalangluya sumugod sang Marso 6 kun sa diin nagpalangatol man ang iya tutonlan.
Sang Marso 13, nagsugod ang iya hilanat rasun nga nagtumar ini sang bulong nga paracetamol apang nagabalik-balik lamang ang iya ginabatyag.
Ginakurog ini, mamala ang iya ubo nga wala sang plemas kag nakabatyag man sang hapo ilabi pa nga asthmatic ini.
Aminado man siya nga nakapamilasyon pa ini sa iya nagtaliwan nga himata sang Marso 12, apang bangud sa iya ginabatyag, ginpakamaayo sini nga magtenir sa ila balay sa sulod sang pila ka adlaw.
Nagdesisyon ini nga magpa check up sa Roxas City sadtong Marso 16, apang sang nag-agi ang ila ginsakyan nga van sa border checkpoint sa Barangay Balijuagan kun sa diin gintsekyar ang mga sakay, nakitaan ini sang sintomas sang COVID-19 sang mga katapo sang Roxas City Emergency Response Team rasun nga gindala ini sa isa ka pribado nga ospital sa siyudad.
Pagkahapon gin-refer ini sa Roxas Memorial Provincial Hospital kun sa diin na siya gin-confine bilang isa ka patient under investigation (PUI).
Gin-diagnose si Patient No. 13 nga may pneumonia kag sang Marso 18, ginkuhaan sang specimen agud ipadala sa Research Institute for Tropical Medicine para sa laboratory test.
Makaligad ang anum ka adlaw, sang Marso 24, nagguwa ang resulta sang test sa RITM kag kumpirmado nga may yara sang COVID-19 si Patient No. 13.
Sina man mismo nga adlaw, gindala si Patient No. 13 sa Western Visayas Medical Center sa Iloilo City para sa dugang nga pagbulong.
Malipayon naman ang pasyente nga ginpabutyag sa Bombo Radyo nga sa karun, amat-amat na nga nagaayo ang iya kundisyon kag padayon man ang iya pagtumar sang mga bulong nga ginahatag sa iya sang mga doktor.
Suno pa sa iya, nagbalik naman ang iya gana sa pagkaon.
Si Patient No. 13 ang pinakauna nga nagpositibo sa COVID-19 sa probinsiya.
‘NAGPASALAMAT SA MGA NAGAKABALAKA KAG NAGASUPORTA’
Ginpasalamatan ni Patient No. 13 ang mga tawo nga nagapalab-ot sang pagkabalaka kag pagsuporta sa iya matapos nga ini ang nagpositibo sa COVID-19.
Nagpangayo man ini sang pasaylo sa mga indibidwal nga iya nakasugata ukon nakasakay sang mga inadlaw nga wala pa niya mahibaluan ang iya matuod nga kundisyon.
Indi man niya matul-id kun sa Metro Manila gid man sini nakuha ang iya balatian.
Apang ginkasubo niya nga sa pihak sang iya kahimtangan, may yara sa gihapon sang mga nagpalapta sang sala nga mga impormasyon may kaangtanan sa iya kundisyon.
Mahibaluan nga samtang ginabiyahe ini padulong sa Western Visayas Medical Center matapos nakumpirmar nga may yara siya sang COVID-19, may mga nagpalapta sang balita nga ini ang napatay na.
Ginkadismaya man niya ang pagpalapta sang iya mga laragway sa social media sang mahibaluan nga positibo siya sa balatian.
Bangud sini ginpakamaayo niya nga ipa-deactivate ang iya account sa social media agud malikawan nga makita ang nagalapta nga mga sala nga impormasyon angut sa iya kahimtangan.
Gintuad man sini nga mismo si Governor Esteban Evan Contreras II ang nagtawag agud magpangamusta kag nagpanugyan nga magpakabakod lamang ini agud malampuwasan ang balatian.
Aminado si Patient No. 13 nga wala ini naglaum nga magpositibo sa COVID-19 ang resulta sang iya laboratory test sa pihak nga tuman na sadto ang pagkahangawa sang iya pamilya.
Kampante naman ini nga wala niya malatnan sang balatian ang iya pamilya, kag mangin ang iya mga nakaupod sa Metro Manila ang nagpasiguro sa iya nga yara sa maayo ang ila kahimtangan kag wala nakaangkon sang sintomas sang COVID-19.
Masami man ini nga naga-istorya sa iya nga pamilya kag iban nga kaabyanan pinaagi sa cellphone ilabi na bangud indi man ang mga ini personal nga makapalapit sa iya sa ospital bangud sa iya kahimtangan.#
