ROXAS CITY — Nagakalisod subong ang pamilya sang Capizeño nga soldado nga kalakip 11 ka mga soldado nga aksidente nga naigo sa surgical airstrike sang militar sa Marawi City.
Suno Kay Mrs. Loreto Lago, iloy sang napatay nga soldado nga si Sgt. Throlen Lago ulihi na siya nakabalo nga ginpadala gali ang iya anak sa Marawi City bangud sa iya pagkahibalo nadestino lamang ini sa Lanao Del Norte.
Si Sgt. Lago ang katapo sang Alpha Company, 15th Infantry Battalion sang Philippine Army kag nagapatigayon sang clearing operation ang iya unit sa Marawi City sang mahulogan sila sang bomba gikan man mismo sa SF-260 aircraft sang AFP.
Ginpahayag sang ginang nga sa una nga report nga nakalab-ot sa ila, napatay sa ambush ang iya bata kag ulihi na nila nakumpirmar nga napatay ini sa airstrike sang militar samtang nagapatigayon sang clearing operation sa Marawi City.
Nabaton naman ni ginang Lago ang nadangatan sang iya anak apang luyag niya nga ma-imbestigaran ang natabo agud matul-id kun ano ang matuod nga rasun sang insidente.
Mahibaluan nga magluwas sa 11 nga nagkalamatay sa ginapahayag ‘friendly fire’, pito ka iban pa ang samaron sa mga katapo sang militar.
Base sa impormasyon nga nakalab-ot sa pamilya Lago, halos indi na makit-an ang iban nga parte sang kalawasan sang mga soldado nga naigo sang airstrike kag ginapahayag ulo na lamang sang sarhento ang narekober.
Nagpasalig naman suno sa iya ang militar nga dal-on pauli sa Mambusao ang nabilin sa bangkay ni Lago kag gusto man sang pamilya sini nga mahatagan sang disente nga lubong ang napatay nga soldado.
Si Lago ang 17-anyos na sa serbisyo kag nakapangasawa sa Calatrava, Negros Occidental kun sa diin man siya nadestino sadto; may yara sila sang duha ka lamharon pa nga mga kabataan.
Katapusan nga nakapauli si Lago sa banwa sang Mambusao sang Disyembre 2016 kun sa diin ginpabunyagan pa niya ang iya hinipo nga bata.
