ROXAS CITY, CAPIZ- Naghatag sang full military honors ang 3rd Infantry (Spearhead) Division (3ID) sang Philippine Army kay 1st Lieutenant John Bryan E. Sobredo, isa ka Capiznon army officer nga napatay sa engkwentro sa Camarines Sur.
Nag-abot ang iya nga bangkay sa Roxas City Airport sang Dominggo, Disyembre 21, 2025.
Sa interview sang Bombo Radyo kay Captain Jessie Jun Ebalan, Chief sang 3rd Infantry Division Public Affairs Office, iya ginpahayag nga ang amo nga kahiwatan sang mga soldado ang isa ka simbolo sang paghatag sang pasidungog sa isa ka tawo nga nagtaliwan bangud sa iya nga pagsakripisyo kag paghatag sang kaugalingon nga kabuhi para sa kalinong kag katawhay sang pungsod.
Suno kay Ebalan, napatay sang Disyembre 19 sa engkwentro sang tropa sang 9th Infantry Battalion kag sang Communist Terrorist Group sa Balatan, Camarines Sur ang amo nga soldado.
Nahibaluan nga si 1st Lieutenant John Bryan E. Sobredo, ang tumandok sang Barangay Jaena Norte, Jamindan, Capiz.
Sa subong, nakahamyang na ang bangkay sini sa ila nga puluy-an, samtang nagpalab-ot naman sang pagpakig-unong ang pamunuan sang 3ID kag ginsigurado ang padayon nga suporta sa nabilin nga pamilya sang napatay nga opisyal.
Interviewed by Bombo Francis Biñas
