ROXAS CITY – Ginklaro ni Capiz State University (CAPSU) President Dr. Editha Alfon nga indi sang konektado kag indi sang faculty sang CAPSU-Pilar Sattelite Campus ang tatlo ka mga ginapahayag manunudlo nga nadakpan nga naga-ruro sang ilegal nga droga sa isa ka beach resort sa Barangay Natividad, Pilar, Capiz.
Suno kay Dr. Alfon ang nadakpan nga sanday Rey Engarcial, 33 anyos sang Barangay Pusok, Lapu Lapu City, Cebu; Rhandy Tandoy Jr., 22 anyos sang Barangay Basak San Nicolas, Cebu City; kag Alvin Kho 48-anyos sang Barangay Kamamalan, Cagayan de Oro City ang lunsay konektado sa ACCESS Computer Tutorial Learning System.
Ginpahayag ni Dr. Alfon nga nagpalapit ang mga ini sa talatapan sang CAPSU agud magpangayo sang bulig sa ila nga pagtudlo sang Basic Computer Literacy sa mga out-of-school youth.
Apang bangud mga computers kag kagamitan sang CAPSU ang pagagamiton, nagdihon sang isa ka Memorandum of Agreement (MOA) ang CAPSU kag ang nasambit nga ahensiya kun sa diin may naga-assist nga mga empleyado sang CAPSU para sa pag-gamit sang ila pasilidad sa tagsa ka Sabado kag Dominggo nga adlaw.
Suno pa kay Alfon nga mga empleyado sang CAPSU ang nagatudlo sa mga out-of-school youth kag ginasunod lamang ang module sang ACCESS.
Suno kay Alfon nga nagsugod sadtong bulan sang Hulyo ang nasambit nga aktibidad kag magatakop kuntani sa bulan sang Nobyembre.
Matandaan nga nadakpan nga nagapatigayon sang pot-session sanday Engarcial, Tandoy kag Kho sa Tirol Beach resort kun sa diin ang mga ini nagcheck-in.
Narekober sa mga ini ang duha ka empty sachet nga may shabu residue, aluminom foil, blade kag duha ka cellphone.
Nakuha naman sa bulsa ni Engarcial ang isa ka sachet sang shabu kag cellphone.
Matandaan nga ginpasakaan na sang kaso nga paglapas sa Republic Act 9165 ukon Comprehensive Dangerous Drugs Act of 2002 ang nasambit nga mga indibidwal.
