Cashier’s office sang St. Anne Parish sa Sapian, ginsulod sang kawatan, donasyon nga kuwarta, nataban

ROXAS CITY – Nataban sang wala makilala nga kawatan ang kapin P8,000 nga kuwarta nga nagikan sa donasyon, sa cashier’s office sang St. Anne Parish, sa Barangay Poblacion, Sapian, Capiz.

Sa pagpakig-angut sang Bombo Radyo kay Punong Barangay Erwin Baldisimo, ginsiling sini nga natalupangdan nalang kahapon sang aga, Pebrero 28, nga naga-ulukay na ang amu nga opisina sang Kumbento kag nadula na ang nasambit nga kantidad.

Ginpahayag nga posible nag-agi sa bintana ang mga kawatan bangud sa nakit-an nga ginkakas kag ginbuka nga jalousie window.

Ginpabilin man sang wala makilala nga kawatan ang sensilyuhon nga kuwarta nga nasulod sa plastic.

Samtang, ginahibalo naman sa karon ang mga suspek sa pagpangawat.