Suno kay Cong. Valeriano, naghalin ang reklamo sa isa ka online post ni Barzaga kun sa diin gin hambal niya nga ang mga miyembro sang National Unity Party (NUP) nakabaton sang suhol halin sa negosyanteng si Enrique Razon.
Gin-alegar man, ang ginbaton anay nga kwarta para suportahan kag mabutang sa puwesto si House Speaker si Leyte 1st District Rep. Martin Romualdez.
Ini nga pahayag, wala gin ako ni Cong. Valeriano nga sa kung diin wala siya nakabaton sang bisan ano nga kantidad sang kwarta halin sa negosyante.
Partikular man nga ginpasaka ni Cong. Valeriano ang reklamo nga Cyber Libel sa idalom sang Section 4(c) sang Republic Act No. 10175 ukon Cybercrime Prevention Act of 2012.
Para sa mambabatas, ang gina-alegar nga panuhol naghatag sang indi maayo nga imahe sa isa ka miyembro sang kamara, gani ginkabig niya nga magpasaka sang reklamo batok kay Rep. Kiko Barzaga.
Ang ini nga cyber-libel case nga ginpasaka ni Cong. Valeriano nagasunod man sa ginpasaka man nga reklamo ni House Deputy Speaker kag Antipolo City Rep. Rolando Puno batok man kay Barzaga.
Bangud sini, may mensahe man ang lehislador nga mangin maayo ukon “magpakabuot” kuntani si Rep. Kiko Barzaga.
Bukas ang talatapan sang Bombo Radyo para sa bisan ano nga pahayag ukon reaksyon ni Cavite Rep. Kiko Barzaga nahanungod sa reklamo nga ginpasaka batok sa iya.
