Nag-apelar ang Catholic Bishops’ Conference of the Philippines (CBCP) sa mga Pilipino nga magpangamuyo kag indi magkampanya para kay Louis Antonio Cardinal Tagle nga mangin masunod nga Santo Papa kasunod sang kamatayon ni Pope Francis sang Lunes, Abril 21.
Suno kay CBCP Episcopal Commission on Public Affairs executive secretary Fr. Jerome Secillano, dapat tahuron ang kahilwayan sang mga elector’s kag ang mahimo naton amo ang pagpangamuyo para kay Cardinal Tagle, ang standing pro-prefect sang Dicastery for Evangelization kag ang iban pa nga nabilin nga mga cardinal-electors.
Gin-athag man sang opisyal sang CBCP nga mahimo ini ma-misinterpret bangud mahimo nga maimpluwensyahan sang outside forces ang conclave kun mangin masunod nga pontiff si Cardinal Tagle.
Ginhimo sang CBCP ang pahayag matapos ginreport nga isa si Cardinal Tagle sa mga “papapili” ukon contenders nga mangin masunod nga Santo Papa nga magapanguna sa 1.4 milyones ka mga Katoliko sa bug-os nga kalibutan.
Ginatawag man sang iban si Cardinal Tagle nga “Asian Pope Francis”.
Pagkatapos sang lubong ni Pope Francis sa Sabado, Abril 26, magatipon ang mga Cardinal nga naga-edad sang 80 anyos panubo para sa conclave kag magboto para sa masunod nga Santo Papa.
May kabug-usan nga tatlo ka mga cardinal-electors halin sa Pilipinas, magluwas sanday Tagle, Pablo Virgilio Cardinal David sang Kalookan kag Jose Cardinal Advincula sang Manila.
