Nagapanawagan si Senator Loren Legarda nga indi lang dapat mangin temporaryo ang ceasefire sa Gaza sa tunga sang Israel forces kag sang Palestinian group nga Hamas.
Suno kay Legarda, mangin alagyan ini sa humanitarian aid kag makabulig para sa liwat nga pagbangon sang mga komunidad nga ginguba sang giyera.
Pahayag pa sini nga mangin kahigayunan ini para sa dalayon nga pagbangon sang Gaza kun sa diin ginapasiguro ang luwas nga pagbalik sang minilyon nga residente nga nadulaan sang ilistaran subong man ang pagtukod sang mga essential infrastructure kasubong sang edukasyon, healthcare, livelihood kag food security.
Ginpahayag pa ni Legarda nga indi lang dapat mauntat sa ceasefire ang kasugtanan kundi dapat masolusyunan man ang iban pa nga madalom nga isyu sang kapigaduhon, marginalization kag indi patas nga pagtratar.
Nagalaum man ang senadora nga igapatuman sang mga involved sa giyera ang kasugtanan nga ceasefire kag ang plano nga paghilway sang mga hostages.
