ROXAS CITY – Ginsabat sang Chief of Hospital sang Mambusao District Hospital ang reklamo sang himata sang isa ka tigulang nga pasyente nga may yara sang tumor sa tutunlan nga ginaalegar ginpamalibaran nga i-admit sa nasambit nga ospital.
Sa interview sang Bombo Radyo kay Dr. Florencio Luching ginpahayag sini nga wala ginpamalibaran sang mga staff ang nasambit nga pasyente sang tion nga gindala ini sa nasambit nga ospital.
Suno kay Luching nga gin-asikaso kag ginbulong sang on duty nga doktor kag mga nurses ang samad sang nasambit nga pasyente apang gin-abisohan na lamang nga magpauli sa ila nga panimalay bangud indi man kinahanglan nga i-admit ini sa ospital.
Gin-athag ni Luching nga wala man nagpamamilit ang mga himata sang pasyente kabaliskaran sa alegasyon nga ginpalab-ut sa Bombo Radyo.
Gindugang pa sini nga nabudlayan ang mga staff nga mag-asikaso sa pasyente bangud masami ini nga ginabay-an sangiya mga himata.
Ginpanginwala man sini nga ginbalibaran sang ospital nga i-admit ang pasyente bangud wala na sang unod iya sini nga Philhealth.
Suno kay Luching nga wala sa pagsulundan sang ospital nga balibaran ang mga pasyente nga i-admit nga wala sang unod ang Philhealth.
Ginkalain sang buot ni Luching nga ginpost sang mga himata sang pasyente sa facebook ang ginhimo sang mga nurses sang nasambit nga ospital nga wala man sang kamatuoran.
Samtang, ginpakamaayo ni Luching nga magpadulong na lamang sa iya nga talatapan ang himata sang mga pasyente nga may yara sang reklamo sa serbisyo sang nasambit nga ospital agud likawan ang pagpost sa social media.
Sa karon na-admit na sa nasambit nga ospital ang pasyente sang tinalikdan nga Lunes nga adlaw.
