ROXAS CITY – Naglunsyar sang 11 ka missiles ang China sa dagat nga nakapalibot sa pungsod Taiwan sa sulod sang isa ka adlaw.
Ini ang ginkumpirmar ni Dr. Reynand Dumala-on, Bombo International Correspondent sa Taiwan sang mainterview sang Bombo Radyo.
Suno diri, ang paglunsyar sang missiles sang China isa ka pagpamatuk kag pagpakita sang kaakig sa pagbisita ni US House Speaker Nancy Pelosi sa Taiwan kag kabahin man sang simulation rehearsal pananglitan may yara sang gyera nga matabo.
Nagapati ang gobyerno sang China nga ang pagpadulong ni Pelosi amu ang pagpasangkad sang relasyon sang Taiwan kag US.
Gintuad man ni Dumala-on nga magatimalos ang Taiwan kag nagapreparar na sang pagagamiton nga missiles sa masunod nga semana.
Gintul-id man sini nga wala na nahadlok ang mga Taiwanese bangud madugay na nga ginapahog sila sang pungsod China.
Pananglitan matabo ang gyera sa tunga sang duha ka pungsod, nakahanda na ang mga tunnels nga sarang maka-akomodar sang madamo nga mga Taiwanese kag maluwas sa peligro.
Dugang pa sini nga madamo nga mga lugar ang ginpahamtang sang military base kag nakastandby ang militar force kun magpamilit magsulod sa teritoryo sang pungsod ang Chinese military aircraft.
