Nagsugod na ang una nga adlaw sang tuigan nga pagsug-alaw sang Chinese New Year sa Capiz subong nga adlaw sang Enero 27, 2025.
Ginsuguran ini pinaagi sa isa ka seremonya nga Lion Eye Dotting Ceremony nga ginpatigayon sa Capiz Provincial Capitol Grounds subong nga aga.
Sa pagpakig-angut sang Bombo Radyo kay Doctor Cesar Yap- Vice President of Roxas Filipino – Chinese Chamber of Commerce INC., ginpahayag sini nga ang amu nga seremonya ang una nga ginpatigayon agud nga tabugon palayo ang mga negatibo kag malain nga mga spirito sa aton nga palibot.
Ini man suno ang pagpati sang mga Chinese kag para nga pukawon ang Lion agud nga magdul-ong sang swerte, ikaayong lawas, kag kabuganaan sa kabuhi sang tawo.
Dugang pa ni Yap, nga agud magapabilin ang positibo nga enerhiya sa tagsa-tagsa ka indibidwal kag saulugon sang masinadyahon kag mabinungahon ang Chinese New Year.
Mahibaluan nga apisar kadam-an sa mga tawo ang nagapati nga ang man-og, traidor kag malain, sa Chinese naman nga pagpati, ang man-og isa ka simbolo sang kaalam, pagbag-o kag kauswagan.
Samtang, sa padayon nga pag-saulog sang Chinese New Year 2025 sa Capiz sa masunod pa nga mga inadlaw madamo pa nga mga aktibidad ang nakalinyada.
