ROXAS CITY – Indi pa ‘season’ sang angel wings ukon diwal rason nga hugot pa nga ginadumilian ang pagsalom sini.
Ini ang ginpahayag sang Regulatory Designated Officer sang City Agriculture’s Office nga si Rizaldy Astrolabio sang mainterview sang Bombo Radyo.
Kasunod ini sang pagkadakop sa isa ka negosyante sa Teodoro Arcenas Trade Center (TATC) kun sa diin narekober ang kapin 38 kilos nga diwal.
Matandaan nga ang nadakpan nga negosyante ang ginkilala nga si Ramonita Torrez, 71 anyos sang Barangay Tanque.
Tuyo kuntani nga ipadala ni Torrez ang isa ka box nga diwal nga nakuha sa Barangay Punta Cogon sa Kalibo, Aklan.
Apang natukiban sang administrador sang amo nga merkado publiko ang pagbaligya sini rason nga ini ang ginkompiskar.
Panindugan naman ni Astrolabio nga indi pa sang harvest time sang diwal rason nga magapangatubang sa nagakaigo nga penalidad ang nasambit nga negosyante.
