BOMBO ROXAS – Ginkumpirmar sang Chairman sang Committee on Infrastructure sang Sangguniang Panlungsod nga madamo sang nabaton nga reklamo ang konseho sang syudad angut sa mga kalalakinhan nga masami naga-uba sang bayo sa mga pampubliko nga lugar kabangdanan nga ginpapasar ang ordinansa nga Anti-Half Naked Ordinance.
Suno kay City Councilor Midelo Ocampo, madugay na ini nga gintun-an antes nadesisyonan nga ipapasar sa konseho.
Ginpahayag ni Ocampo nga bangud sa maayo nga pagpresentar sa konseho kag pagsabat sa pila ka mga palamangkutanon sang iban nga mga konsehal, natigayon nga mapapasar ang nasambit nga ordinansa.
Gintutukan man nila ang nasambit nga reklamo kun bala problema man ini sang kadam-an sang mga pumuluyo kabangdanan nga ini ang nagtulod sa iya agud magpabor sa pagpapasar sang amo nga ordinansa.
Ginalauman naman sini nga makabaton sang negatibo nga komento ang mga laragway nila kaupod ang tatlo sini ka mga kaupdanan nga konsehal kun sa diin nag-uba sang bayo matapos napapasar ang nasambit nga ordinansa.
Dugang pa ni Ocampo nga ang tinutuyo man nila ang pag-uba sang bayo indi agud ipakita ang maayo nga panglawason nila nga mga konsehales sa baylo ipahanumdom kag ipakita sa publiko nga indi maayo nga maglakat sa dalanon nga wala sang pang-ibabaw nga panapton.
Suno diri nga kabahin ini sang isa ka awareness sa tanan nga mga pumuluyo.
Samtang, naghinyo naman si Ocampo sang pasaylo sa publiko sa sala nga pagka-intindi sa mayor nga tinutuyo sang nasambit nga ordinansa.
