ROXAS CITY -Ginka-alarma ni City Councilor Moreno Gonzaga ang padayon nga protitusyon sa siyudad sang Roxas sa pihak nga may yara sang ginapangatubang nga pandemiya.
Sa interview sang Bombo Radyo sa kay Gonzaga ginpahayag sini nga gin-kaalarma sini ang padayon nga pagduging sang mga kababainhan nga nagabaligya sang hingalit nga kalipay sa tunga sa kagab-ihon sa pila ka mga lugar sa siyudad.
Suno sa kay Gonzaga nga personal ini nga naglibot sa siyudad kun sa diin na-aktuhan sini ang mga nasambit nga mga kakababainhan.
Gindugang pa sini nga magluwas sa prostitusyon, nagakahangawa man ini bangud posible tunaan ang mga ini sang paglapta sang virus sa siyudad.
Magluwas nga nagalapas sa ginatuman nga curfewhours, ang iban sang mga kababainhan ang wala nagasuksuk sang facemask kag faceshield.
Ginkompirmar sini nga iban sa ila ang gindala sang mga kapulisan sa Roxas City Crisis Center bangud nagabato kun sawayon sang mga otoridad.
May yara man sang mga barangay tanod nga naga-roving sa palibot apang madasig ang mga ini sa pagpanago sa tion nga malapit na sa ila ang patrol.
Samtang ginkalipay naman ni Gonzaga wala na ini sang may nakita nga naga-operate nga mga ktv bar sa siyudad subong nga pandemiya.
