ROXAS CITY – Gintukod sang Roxas City Government ang Solid Waste Management Speaker Bureau agud mas mapasangkad kag matudlo sa pumuluyo ang “proper waste segregation” ukon ang intsakto nga paghaboy sang basura sa guwa man ukon sa sulod sang kaugalingon nga panimalay.
Ini ang ginkumpirmar ni Mr. Ronald Amigo, Pinuno sang City Environment and Natural Resources (CENRO) sang mapakig-angutan sang Bombo Radyo.
Mangin kaupod nga stakeholders sa sini nga proyekto ang DepEd, BFP, Coast Guard, PNP, kag SK nga amu ang makabulig kampanya sa mga pumuluyo.
Ginapangayo sang gobyerno syudad ang kooperasyon sang pumuluyo nga iseparar ang mga madunoton, indi madunoton kag recyclable.
Mas maayo suno diri nga ibutang sa saku ang mga plastic amu man ang lata agud mapuslan pa ukon madala sa junk shops.
Mahimo man ibutang ang basura sa stable, mapag-on, kag may takop nga basurahan agud indi hinali nga makaykay sang kasapatan samtang wala pa naga-abot ang garbage collectors.
Ginsuhestiyon ni Mayor Ronnie Dadivas nga pagabutangan sang sonata ang garbage truck agud magaserbe nga senyales nga yara na sila sa lugar kag mangolekta sang basura.
Magapaguwa man sila sang skedyul sa pagkolekta sang basura agud makapreparar ang pumuluyo.
Samtang, kun mapapasar ang ordinansa nga ginaduso sang city government may kaangtanan sa paghaboy sang basura, maga-isyu ang CENRO sang citation ticket ukon magahatag sang bayolasyon kun madakpan ang sin-o man nga wala naga segregar sang basura.
Pinaagi sini, mapabilin suno diri ang katahum kag katinlo sang syudad sang Roxas.
