ROXAS CITY – Ginpakigbahin ni City Mayor Ronnie Dadivas ang mangin prayoridad sang iya administrasyon sa masunod nga anom ka bulan nga kalakip sa iya nga 3-year Development Agenda.
Ini ang kasunod sang ginpatigayon nga Executive Legislative Agenda (ELA) sang gobyerno sang siyudad sa Iloilo City.
Suno sa alkalde, isa sa iya pagatutukan amo ang libre nga Hypertension Maintenance kag Anti-Diabetes Medication sa mga indigent nga mga senior citizen sa siyudad.
Suno sa alkalde nga importante nga balikdon ang mga ginikanan, lolo, kag lola pinaagi sa paghatag sa ila sang kalipay kag pagpahagan-hagan sang ila ginabatyag nga pag-antos sa ila balatian.
Isa man sa mangin prayoridad sang alkalde amo ang year-long feeding program para sa tanan nga mga Daycare pupils nga ‘undernourished’ sa siyudad sang Roxas.
Suno kay Dadivas nga importante nga masustansiya ang ginakaon sang mga kabataan agud mapasanyog ang ila performance sa eskwelahan.
Magadihon man sang scholarship program ang gobyerno sang siyudad para mahatagan sang educational assistance ang ‘deserving’ nga mga college students.
Isa ini ka pamaagi agud mabuhinan ang palaligban sang mga ginikanan sa mga balaydan sa eskwelahan.
Pagahatagan naman sang libre nga PhilHealth ang mga barangay officials, Barangay Health Workers, Barangay Social Workers, Day Care Workers kag mga Barangay Tanods sa magkatuhay nga mga kabaranggayan sa siyudad.
Nagakadapat suno sa alkalde nga indi pagpabay-an ang mga madugay na nga nagaserbisyo sa barangay nga gintawag sini ‘first line of defense’.
May nagakaigo man nga plano ang alkalde agud mapasanyog ang turismo sa siyudad pinaagi sa pag-angkon sang Heritage Interactive Landmark Lighting nga pagapondohan sang 23.8 milyones pesos.
Ginpasalig man sang alkalde nga kada bulan, magapatigayon sang Serbisyo-Caravan ang gobyerno sang siyudad.
Diri suno sa iya makaangkon ang mga pumuluyo sang libre nga medical consultation, bulong, dental services, legal assistance, feeding program, infrastructure support kag social services.
