ROXAS CITY – Ginpasiguro ni Roxas City Mayor Ronnie Dadivas nga wala sang diskriminasyon nga matabo sa mga pumuluyo nga naga-estar sa lugar kun sa diin may mga nag-positibo sa coronavirus disease (COVID-19).
Sa interview sang Bombo Radyo, ginpahayag sang alkalde nga sa subong nga pandemiya, tion ini agud magbuligay ang tanan kag indi para sa diskriminasyon.
Matandaan nga hugot nga sang damlag lang, hugot nga ginkondenar sang alkalde ang ginaalegar pagbalibad sang tatlo ka mga birthing clinics sa siyudad kalakip na ang City Health Office nga makaanak ang isa ka nagabusong nga ginang nga taga-Barangay Culasi.
Suno sa alkalde nga matapos nakalab-ot sa iya ang nasambit nga insidente, gilayon sini nga ginpasumiter sang incident report ang talatapan sang City Health Office.
Magluwas diri, ginpamatian man ang bahin sang ginang agud mahibaluan sang alkalde ang pagahimuon sini nga aksiyon natuhoy sa natabo.
Kun mapamatud-an suno diri nga may diskriminasyon nga natabo sa isa ka talatapan sang gobyerno, may yara diri sang ‘accountability’ ukon salabton ang empleyado.
Samtang sa pribado naman, mahimo nga ma-suspendi ang ila nga mayor’s permit kag temporaryo nga mapauntat ang ila operasyon.
