ROXAS CITY – Naga-ugyon si Roxas City Mayor Ronnie Dadivas sa panindugan sang League of the Municipalities of the Philippines (LMP) Capiz Chapter nga temporaryo nga pagpaiway sang pagpapauli sang mga locally-stranded individuals (LSI’s) kag Returning Overseas Filipinos (ROF’s).
Suno sa alkalde, apisar nga indi siya miyembro sang amo nga grupo, nahangpan sini ang ginakahangaw-an sang iban nga local chief executives sa probinsiya.
Ginpahayag sini nga wala man siya nagapamalabag sa pagpapauli sang mga LSI’s kag ROF’s apang mas maayo suno diri nga hagan-haganon ang pagpapauli sa ila nga magadepende sa kapasidad sa pag-akomodar sang isa ka local government units (LGU’s).
Suno diri nga dako man nga risgo sa isa ka komunidad kun indi na masarangan ang pag-akomodar sa mga magapauli nga LSI’s kag ROF’s.
Kun indi suno diri maghatag sang Letter of Acceptance (LOA) ang isa ka local chief executive, nagapatimaan lamang ini nga indi na masarangan sang isa ka LGU ang pag-akomodar.
Aminado man ang alkalde nga may mga LSI’s kag ROF’s sa siyudad nga naga-overstay na sa quarantine facility bangud sang backlog sang test results gikan sa Western Visayas Medical Center (WVMC) sa Iloilo.
Bangud diri suno kay Dadivas, nagdihon ini sang Memorandum of Agreement (MOA) sa isa ka pribado nga ospital nga nagahatag sang RT-PCR tests para sa madasig nga pagpaguwa sang mga resulta.
