Ginkumpirmar ni Coach Tim Cone nga padayon sa gihapon ang preparasyon sang Gilas Pilipinas sa pihak sang una na nga na-report nga indi anay malakip sa lineup ang player nga si Kai Sotto.
Suno kay Cone wala sila sang oras nga pagauyangon sa mga ginplastar nga schedule sang hampang.
Kadungan sini, gin-ako ni Coach Tim Cone nga mangin mabudlay ang maagyan sang Gilas bangud sa asud-asod sini nga mga schedule sang flight sa nagkalain-lain nga pungsod.
Apang dugang pa sini, ginpakigbahin ni Cone nga ginakabalak-an niya ang posibilidad nga kulangon man sila sang oras sa pag-ensayo sa pagsabak liwat sang Gilas sa Fiba Asia Cup qualifiers.
Paathag sini, ang ila nga iskedyul sa Agosto ang lima ka adlaw lamang nga preparasyon antes ang mismo nga adlaw sang hampang.
Samtang, gin-athag naman sang Gilas Pilipinas coach nga padayon sa gihapon sini nga ginapaminsaran kun paano ang mangin set-up sang team sa mga masunod nga hampang. Ini ang sa pihak sang iya pakasubo sang nabalitaan nga indi anay makaupod si Kai Sotto sa paghampang bangud sa injury.
