ROXAS CITY – Kampante ang Commissioner sang National Commission of Senior Citizens nga pagapirmahan ni Presidente Rodrigo Duterte ang resolusyon nga ginpapasar sang senado sang Lunes, nga pataasan sang P1,000 kada bulan ang pagabatunon nga social pension sang mga Senior Citizens.
Sa interview sang Bombo Radyo kay Mr. Edwin Espejo, ginpahayag sini nga nakadepende na sa presidente kun iya ini nga pagapirmahan agud mapatuman ang dugang nga social pension, apang nagapati ini nga paga-aksyunan ini ni Presidente Duterte.
Sa tion nga indi mapirmahan ni Duterte, bangud magatakup na ang termino sini sa Hunyo, 30, nakadepende na kay President-elect Ferdinand ‘Bongbong’ Marcos Jr., ang amu nga resolusyon.
Nahibaluan nga 12 million ang populasyon sang mga Senior Citizens sa pungsod kag sang tuig 2020, nangin 4.05 million ang nangin resipyente sang amu nga programa sang DSWD.
Dugang pa ni Espejo nga sa karon nga tuig, may pondo nga P25 billion para sa social pension sang mga katigulangan, kag magakinahanglan sang P50 million tubtob P60 million nga budget ang gobyerno para sa dugang nga pension.
Aminado ang nasambit nga Commisioner nga madamo sila sang nababaton nga reklamo angut sa pagpasulod sang kwalipikado nga katigulangan sa amu nga programa, apang suno diri, nagakoordinar na ini sa talatapan sang DSWD agud mapasulod ang yara sa waiting list, bangud sila gid lamang ang ahensya nga mahimo maka-determinar sang pondo.
