ROXAS CITY – Nagpatawag sang hearing ang Committee on Education
kag ang mga resource person nga ila gin-imbitar amu sanday Mrs. Robil Billasoto, pinuno sang scholarship secretariat kag Dr. Salvador Ocharo Jr., School Division Superintendent sang DepEd-Capiz, apang napaslawan ang mga ini nga makatambong sa amu nga pagsinapol.
Sa interview sang Bombo Radyo kay Board member Jonathan Sonny Besa, ginpahayag sini nga ginarekomendar sang nasambit nga komitiba nga gin-aprubahan naman sang Sangguniang Panlalawigan nga pagapasakaan sang kiha si Billasoto sa Civil Service Commission kag pila ka mga ahensya kag ginarekomendar man nga imbestigahan si Dr. Ochavo nahanungod sa radio station kag sa mga transistor radio nga ila ginpamakal sa diin madamo ang nakuryente.
Suno kay Besa, sadtong nagligad nga bulan sang Nobyembre 2021, nagsulat si Board member Thea Faith Reyes, chairman sang Committee on Education kun sa diin nagapangayo ini sang listahan sang mga kabataan nga naka-avail sang Scholarship program nga ginahatag sang gobyerno probinsyal apang tubtob sa karun wala pa ini sang nabaton nga listahan.
Pag-abot naman sa isyu ni Dr. Ochavo, ginpahayag ni Besa nga ginrekomendar man sang nasambit nga komitiba nga iga-relieve sa pwesto bilang Division head sang DepEd Capiz.
