ROXAS CITY – Nagpadala sang sulat sa pamunuan sang Capiz Police Provincial Office nga nakapangalan kay CPPO Director Colonel Julio Gustilo Jr. ang isa ka concerned citizen sa Barangay Duran, Dumalag, Capiz natuhoy sa anomaliya sa distribusyon sang Social Amelioration Program (SAP) sa ila nga lugar.
Sa nasambit nga sulat, nagapangabay ini kay Gustilo nga kun mahimo imbestigahan ang implementasyon sang nasambit nga programa bangud sa madamo nga mga anomaliya sa pagpamuno sang kapitan nga si Punong Barangay Victorio Faduga.
Suno diri nga madamo sang mga indi kwalipikado apang nakabaton sang amo nga ayuda nga ginpahanugutan mismo sang barangay officials kag barangay health workers (BHW’s).
Ginapahayag nga naggamit sang mga single nga indibidwal kag mga estudyante ang mga opisyales sang barangay agud makaganar sa amo nga ayuda.
Kalakip man sa nakabaton sang nasambit nga ayuda ang asawa sang pulis kag manunudlo; anak sang mga opisyales sa barangay, BHW’s, barangay tanod, kabulig sang kagawad kag iban nga mga abyan sang barangay officials.
Kalakip sa sulat nga ginpadala sa talatapan ni Gustilo ang mga pangalan sang mga indibidwal nga ginapatihan indi kwalipikado apang nakabaton sang nasambit nga ayuda.
