NETHERLANDS – Magasugod na subong nga adlaw ang confirmation of charges hearing batok kay Former President Rodrigo Roa Duterte.
Ini angot sa ginapangatubang nga kaso nga crime against humanity sa kampanya batok sa iligal nga droga.
Ang nasambit nga hearing ang magahatag sang kahigayunan sa mga judges sang ICC nga usisaon kun may nagakaigo nga ebidensya nga mapamatud-an nga may substancial ground nga si former President Duterte amo ang nagsugo sang nasambit nga mga krimen.
Suno kay Bombo Lucky Charm, International Correspondent direkta sa Netherlands, iya ginpahayag nga magapatigayon ang mga supporters ni Duterte sang peaceful rally bilang panawagan kag paghatag sang suporta.
Suno kay Lucky Charm, magapadulong ang pila ka mga Filipino gikan sa nagkalain-lain nga pungsod kag magatipon sa ‘Duterte Street, kun sa diin magapatigayon sang programa nga puno sang pagpabutyag sang mensahe kag pangamuyo.
Nahibaluan nga magalawig sa apat ka adlaw ang natalana nga hearing nga magasugod subong nga adlaw tubtob Pebrero 27.
Kada adlaw tatlo ka sesyon ang hiwaton: ang una nga sesyon sa subong nga adlaw ang magaumpisa alas 5 tubtob alas 6 sang hapon, oras sang Pilipinas.
Ini ang pagasundan sang isa naman ka session halin alas 6:30 tubtob alas 7:30 sang gab-i kag ang katapusan nga sesyon ang alas 9 tubtob alas 10 sa gab-i.
Magapadayon naman ang confirmation of charges apisar indi magtambong si Duterte matapos tugutan sang International Criminal Court nga i-waive sini ang iya kinamatarong nga indi magtambong.
Nagalaum naman ang natungdan nga mangin matalunsay ang pagpatigayon sang hearing kag ila nga irespeto kun ano man ang mangin desisyon sang korte.
