Ginpakigbahin isa ka law expert nga may mga sitwasyon nga indi mahimo nga ilisan sang photocopy ang original nga dokumento sa korte.
Sa interview sang Bombo Radyo Roxas kay Atty. Don Wade B. Comoro, iya ginpahayag nga sa legal view, ang original nga dokumento amo ang may pinakabaskog nga probative value bangud ini ang ginakabig nga pinakaehemplo sang dokumento nga nagapamatuod sang sulod sini.
Suno sa abogado, mahimo man nga mabaton ang photocopy ukon duplicate bilang ebidensya sa korte, apang kinahanglan nga masunod ang mga kondisyon nga ginapaidalom sang Rules of Court.
Lakip diri ang mga sitwasyon nga nadula ukon naguba ang original nga dokumento, wala ini sa pagdumala sang nagapresentar, ukon may iban nga legal nga rason nga ginatugotan sang korte.
Pahayag pa niya, mahimo nga i-reject sang korte ang photocopy kon may pagdududa sa authenticity sini, ukon kon mapaslawan ang nagpresentar sa pag-authenticate sang dokumento.
Ginpahinumdom man sang abogado nga kon ginapangayo sang korte ang original nga dokumento, responsibilidad sang nagatag-iya sini nga ipresentar ini kon mahimo. Kon yara naman ang original sa isa ka government office ukon iban nga institusyon, mahimo nga magkuha sang certified true copy ukon magpangayo sang opisyal nga sertipikasyon suno sa ginatugot sang layi.
