ROXAS CITY – Kada bulan na magapatigayon sang “Oplan Galugad” ang katapo sang Capiz Rehabilitation Center (CRC) sa Barangay Lawaan, sini nga syudad.
Ini ang ginpahayag ni Arjun Yngcong, CRC Provincial Warden Capiz sang ma interview sang Bombo Radyo.
Pagahinyuon nya suno diri kay incoming Governor-elect Fredenil “Oto” Castro nga paupdon ang katapo sang PNP kalakip ang “sniffing K9 dog” agud makita kun may mga nakatago nga droga sa mga selda.
Ginsiling sini nga ginmanduan niya ang mga gwardya nga hugtan ang pagtsekyar sa mga bisita kag paggamit sang cellphone sang mga preso kag mahimo gamiton sang mga ini ang calling center kun sa diin pamilya kag abogado lang ang mahimo tawagan.
Ginsiguro man sang Warden nga igapanumbalik ang conjugal visitation ukon pagbisita sang mga asawa sang preso sa tion nga madula ang pandemya ukon Covid.
Dugang pa ni Yngcong nga naintindihan sini si anay OIC Boy Apaap kun ngaa wala ini nagatinir sa CRC bangud sa ginsugo lamang ini kag masyado ka sensitibo ang ini nga sahi sang trabaho.
Ginpasalig pa sang nagapanumbalik nga Jail Warden nga pagapadayunon sini ang mga wala matapos nga proyekto, sa CRC.
Matandaan nga nagpatigayon sang sorpresa nga inspeksyon sa mga selda sa Capiz Rehabilitation Center, si Warden Yncong sa Barangay Lawaan, sini nga syudad kaina sang aga.
