ROXAS CITY – Nagbitay-patay ang isa ka criminology graduate sa puno sang mangga sa isa ka barangay sa banwa sang Jamindan, Capiz.
Ang wala na ginhingadlan nga biktima ang may edad nga 25 anyos kag residente sang nasambit man nga lugar.
Base sa nakuha nga impormasyon sang Bombo Radyo, ginkakibot na lamang sang amay sang biktima sang makit-an ang anak sini nga nagalambitin na sa puno sang mangga may 10 metros ang antad gikan sa ila balay gamit ang isa ka electrical cord.
Gindala pa ang biktima sa ospital apang wala na ini matabangan matapos gindeklarar nga dead on arrival.
Kumbinsido ang pamilya nga nagsunggod ang biktima bangud ginhambalan ini nga indi anay magkuha sang board examination bangud kinahanglan nga unahon ang iya nga utod.
Ini ang ginapatihan rason sang pag-utas sang biktima sa iya kaugalingon nga kabuhi.
