ROXAS CITY – Arestado ang 1st year criminology student matapos nga ginkasahan sang drug buy bust operation sa Barangay Banica, Roxas City, alas-7:51 kagab-i sang Sabado.
Ginkilala ang nadakpan kay Renante Demesa, 22 anyos nga residente sang Barangay Salgan, Maayon, Capiz.
Sandig sa nakuha nga impormasyon sang Bombo Radyo sa mga kapulisan, ginpatigayon sang Capiz Police Provincial Drug Enforcement Unit (PPDEU) ang amu nga operasyon kun sa diin dakop sa akto si Demesa nga nagbaligya sang ginasuspetsahan shabu sa pulis nga nagpakuno-kuno nga buyer, sa balor nga P6,400.
Narekober sa posesyon sang suspek ang anum tanan ka sachets sang ginasuspetsahan shabu, ginabulubanta nagabug-at sa 5 gramos nga may balor P34,000; coin purse; cellphone kag Suzuki raider 150 nga motorsiklo.
Ginpahayag nga lakip sa listahan sang Anti-illegal Drugs Watch list provincial level bilang High Value Individual ang nasambit nga estudyante.
Sa karon, nakahunong ini sa karsel sang Roxas City Police Station kag igapaidalom sa drug test.
Sa tion nga magpositibo, natalana ini nga pasakaan sang kaso nga paglapas sa RA 9165 ukon “Comprehensive Dangerous Drugs Act of 2002” ang nasambit nga persona.
