ROXAS CITY – Kuryosidad ang nagtulod sa isa ka Capizeño businessman nga magsulod sa kontrobersiyal nga KAPA Community Ministry International Inc. ukon Kabus Padatoon.
Ini ang ginpahayag ni Mr. Mario Ramos, isa ka kilala nga negosyante sa probinsiya sang Capiz kadungan sang iya nga pagkompirma sang iya pagsulod sa nasambit nga grupo.
Sa interview sang Bombo Radyo Roxas, ginpahayag ni Ramos nga sa pihak sang magkatuhay nga mga kontrobersiya nga ginapangatubang sang grupo, mas nagpangibabaw ang iya nga kuryosidad kag paglaom nga makakuha sang dako nga kantidad sang kwarta gikan sa iya ginhatag nga donasyon.
Ginpahayag sini nga personal siya nga nagpadulong sa KAPA Iloilo-Pavia Branch kag nakaatubang sini ang officer-in-charge nga si Mr. Isagani Capitle.
Nagdesisyon siya nga mag-donate sang P5, 000 kag ginalauman sini nga makabaton siya sang P1, 500 nga love gift matapos ang isa ka bulan.
Apang kun iya nga igalock-in ang kwarta, ginalauman nga makabaton ini sang P14, 000 sa sulod sang apat ka bulan kag nagalab-ot naman sa P2.7 million sa sulod sang 24 ka bulan ukon duha ka tuig.
Mahibaluan nga tatlo ka semana pa lamang ang nakaligad humalin sang naghatag sang iya nga donasyon si Ramos kag nagalaum ini nga dako ang iya nga makuha nga love gift.
