ROXAS CITY – Ginklaro sang regional director sang Department of Agriculture nga indi tanan nga mangunguma sang mais kag mangingisda sa Western Visayas ang makabaton sang fuel subsidy nga programa sang ahensya.
Sa interview sang Bombo Radyo kay Mrs. Remelyn Recoter, Regional Director sang DA, suno diri, target sang ahensya amu ang mga corn farmers kag fisherfolks, apang indi tanan sa sini nga sektor ang pagahatagan bangud may pagasundon nga kwalipikasyon.
Sa mga mangunguma sang mais, nagakinahanglan nga rehistrado ini sa Registry System for Basic Sectors in Agriculture (RSBSA) kag may makinarya nga rehistrado sa ila Municipal Agriculture’s Office ukon sa ila LGU.
Samtang, sa mga magagmay nga mangingisda, nagakadapat nga may sakayan nga may makina kag rehistrado man sa BFAR ukon sa ila munisipyo.
Tinutuyo sini nga programa amu ang mabuligan sa galastuhanon sa padayon nga pagtaas sang produktong petrolyo ang mga kwalipikado.
Nahibaluan nga makabaton ang resipyente sang P3,000 nga balor sang subsidiya sa gasolina.
Buot silingon, makabulig ini sa mga farmers kag fisherfolks sa tion nga magpatughong sang gatong, pinaagi sa pagpresentar sa gasoline station sang ila nga discount card.
Nahibaluan nga sa Rehiyon 6, may yara sa karon sang masobra 3,000 ka mga benepisaryo sa corn farmers, samtang masobra 10,000 naman sa mga mangingisda.
Dugang pa diri nga napa-in na ini nga pondo antes paman ang giyera sang Ukraine-Russia, bangud sa nagatinaas nga presyo sang gatong.
Sa pihak nga bahin, ginkumpirmar ni Recoter nga may aksyon na sila sa ginpadala nga reklamo sang mga wala makabaton sang P5,000 nga assistance sa rice farmer, kag paga-alokaran sang pondo sa masunod nga batch sang ayuda.
