Ginpasalig sang Department of Agriculture (DA) nga padayon nga proteksyunan sang ahensya ang mga lokal nga produkto sa agrikultura kaangay sang bugas, mais, asukar, manok, isda, kag karne sang baboy sa nagapadayon nga taripa nga negosasyon sa tunga sang Pilipinas kag Estados Unidos.
Suno kay DA Secretary Francisco Tiu Laurel Jr., ginhatagan pagtamod nanday Secretary Frederick Go kag Trade Secretary Cristina Roque nga ang kaayuhan sang mga lokal nga mangunguma kag mangingisda amo ang nagapanguna nga prayoridad sang Pilipinas.
Ini matapos nga ginpahayag ni U.S. President Donald Trump nga nagpasugot ang Pilipinas sa 19% nga taripa sa ila mga eksport kabaylo sang duty-free access para sa mga produkto sang Amerika.
Madumduman nga ginklaro sang Malacañang nga wala pa sang pinal nga kasugtanan angut diri.
Dugang pa sang DA nga ginpasalig ni Secretary Go nga wala sang konsesyon nga matabo nga makahalit sa lokal nga industriya kag dapat balansehon ang anuman nga kasugtanan sa pagpasangkad sang merkado kag proteksyon sang palangabuhian sang mga Pilipino.
