ROXAS CITY- Nagpangayo sang bulig sa iya pamilya sa Cebu City ang 19-anyos nga dalaga matapos ginbugaw diri sa Roxas City.
Sa interview sang Bombo Radyo kay alyas Magdalena, ginpahayag sini nga wala niya ginalauman nga mangin waitress ini sa isa ka KTV Bar matapos ginpangakuan nga magatrabaho bilang kabulig sa sulod sang balay diri sa siyudad.
Suno pa sa iya nga gin-recruit sila gikan sa Bacolod City matapos nga maglayas sa ila balay sa Cebu City bangud nagsunggod sa iya mga ginikanan.
Gindugang pa sini nga indi niya masarangan ang ila nga trabaho sa bar bangud magluwas sa pagka-waitress, ginapatable man ang mga ini sa ila mga kustomer nga lalaki.
Nahibaluan gikan sa iya nga ginpalayas ini sang iya amo bangud masami siya nga nagahibi sa tion nga may ipatrabaho sa iya kag ginhatagan lamang ini sang P9.00 nga pamasahe pauli sa Cebu.
Aminado man si Magdalena nga iya ginhinulsulan ang paglayas sa ila balay bangud wala ini sang kaayuhan nga matuga sa iya kabuhi ilabi na kun wala sang trabaho kag kulang ang tinun-an.
