ROXAS CITY – Nataban sang ginpahayag holdaper ang isa ka unit sang smartphone nagabalor P15,000 kag P700 nga unod sang sling bag sang isa ka dalagita, matapos ginaalegar ginhol-up sa kilid sang Villareal Stadium, Camansi St., Barangay Tiza, sini nga syudad.
Sandig sa indi na paghingadlan nga menor de edad, nagabantay sila nga tatlo nga mag-abyan sang motorsiklo nga masakyan, sa atubang sang isa ka tiyangge, mga alas-8 kagab-i, Hunyo 3.
Hinali nalang nga naglabay sa ila atubang ang motorsiklo sakay ang duha ka mga kalalakinhan nga may suksok nga facemask.
Nanaog ang backrider kag gilayon ini ginpalapitan kag gintutukan sang kutsilyo nga ginabulubanta 10 pulgada ang kahabaon, madason ang pagsabnit sang iya smartphone kag sling bag.
Madasig nga nalagyo ang wala makilala nga mga suspek sakay sa wala madiparahan nga motorsiklo.
Ginpakamaayo sang dalagita nga iparekord sa mga kapulisan ang insidente.
Nagapadayon ang imbestigasyon sa nasambit nga hitabo.
