Capiz – Nag-agay ang luha nagikan sa mata sang 17-anyos nga dalagita samtang ginsaysay sa Bombo Radyo ang ginhimo nga pagpanghimulos sa iya sang adoptive father sa sulod sang tatlo ka tuig sa ila puluy-an sa isa ka banwa sang segundo distrito sang probinsya sang Capiz.
Suno kay alyas Nene, kaaganhon sang Setyembre 1, 2016, sang una ini nga ginhimuslan sang adoptive father nga si alyas Rene.
Nagakatulog ini sa iya hulot sang nabatyagan nga nagsulod kag nagdulog sa iya katre ang suspek kasunod ang paghaluk kag pag-uba sang iya naidalum nga panapton.
Wala nakasinggit ang biktima bangud ginpahog ini kag ginpakitaan sang matalum nga hinganiban.
Liwat ini nga ginhimuslan sang suspek sadtong Setyembre 7, 2016, kag ang pinakaulihi sang bulan sang Pebrero 22, sini nga tuig.
Nagkaisog lamang ang dalagita nga magsugid sa iya tiya angut sa natabo sa iya matapos nga gin-akigan ini sang adoptive father bangud wala sini mauyunan ang pagkakita sa iya nga may upod nga lalaki.
Gintuad pa ni alyas Nene nga madugay na sini nga plano nga magsugid sa iya himata apang ginapahog ini sang adoptive father nga pamatyon ang ila nga pamilya.
Nahibaluan nga wala napunggan sang himata sang biktima nga makabatyag sang kaluoy kag nagtulo ang ila mga luha sang nabatian ang masinapat-sapaton nga ginhimo sa dalagita sang ginakabig sini nga amay.
Samtang sang nahibaluan ni alyas Rene nga nakasugid na ang dalagita sa iya paryente, nagbiya ini sa lugar kag wala na makita tobtob sa karon.
Gin-ako sang biktima nga naglain ang iya buot sa kaugalingon nga iloy matapos nahibaluan nga nag-apas ini kay alyas Rene.
Matandaan nga ginpasakaan na sang panumbungon nga 5 counts of rape kag paglapas sa RA 7610 ukon Anti Child Abuse law.
