Padayon nga magatutok ang Mamamayang Liberal party-list first nominee nga si Leila de Lima sa preparasyon para sa impeachment trial ni Vice President Sara Duterte kag sa plano nga lehislasyon.
Ini sa pihak nga ginbaliskad ukon gin-nullify sang Court of Appeals ang desisyon sang Muntinlupa Regional Trial Court Branch 204 nga nag-abswelto kay De Lima sa isa niya ka kaso sa droga.
Suno sa abogado ni de Lima nga si Atty. Dino de Leon, nagapati ang ila kampo nga indi matapos sang desisyon sang korte ang pamahog nga dakpon kag prisuhon si De Lima.
Nagapati ang kampo ni De Lima nga wala sang grabe nga pag-abuso sa diskresyon sa desisyon sang Muntinlupa RTC nga absweltuhon siya.
Samtang, ginpahayag man ni De Leon nga mangin mahinalungon ang una nga nominado sang partido sa pagpreparar sa impeachment trial bangud nagserbe man si De Lima bilang anay justice secretary kag bar topnotcher.
Base sa national certificate of canvass, ang ML party-list yara sa ika-14 nga pwesto, nga nakakuha sang 547,949 ka boto.
